.JPG)
14. junijā Daugavpiļs teatrī nūtyka 2021/2022. goda sezonys nūslāguma pasuokums, kurā kolektivs ar gondariejumu atsavērēs uz paveiktū i apsprīde nuokamuos sezonys planus.
Šūsezon skateituojim tyka pīduovuotys 12 jaunys izruodes. Daļa ( „Dzeivinīku ferma”, kriminaly psihologisko dilogija „Kaija-1” i „Kaija-2”, „Samsona ceļojums”, „Provinces anekdoti”) - sagatavuotys vēļ paguojušajā sezonā, kod Covid19 deļ nabeja īspiejams paruodēt, i beidzūt nūnuoce uz skotuvis.
Aizvadeitajā sezonā teatris uzsuoka sadarbeibu ar režisoru Dmitriju Petrenko, i rezultatā topa sezonys popularuokuo izruode „Tymsī brīži”. Teatra repertuaru papyldynuoja muzykaluo puosoka pīaugušīm „Pa Laimes luoča pādim”, komiska melodrama „Garuos breivdīnys” i eksperimentals īstudiejums „Vyspyrms beja…” Oļega Šapošnikova režijā. Teatra trupai pīsavīnuojās divejis jaunys atrises – Jūlija Ļaha i Agnese Laicāne, obejis spielej izruodē „Dzeive uz ladusskapa durovom” ( rež. M. Korsietis). Kai unikals uorpusrepertuara īstudiejums ir „Cabaret Dinabuorg” , bet par nūzeimeiguokū nūtykumu uzskotama sezonys izskaņā pyrmizruodeituo „Paradīze” – pēc R. Paula mūzykla „Dāmu paradīze” motivim veiduotuo muzykaly dramatiska kompozicija, kuru pagūdynuoja pats Maestro ar savu leidzdaleibu.
Sezonys izruodēs vīsbīžuok īsaisteituo aktrise beja Zanda Mankopa, spielējušīkais aktīrs - Marģers Eglinskis, bet nu dejuotuojim vysbīžuok uz skotuves radzamuos titulu sajēma Vanda Gribovska. Atzineibys roksts par 2021/2022. goda sezonā ieguļdeitū – aktrisem Žannai Lubgānei, Jūlijai Ļahai, Agnesi Laicānei i aktīram Viktoram Jancevičam. Veicynuošynys bolva par pyrmīm panuokumim uz skotuves – Luizai Prokofjevai i Darjai Šagalovai nu Staņislava Broka Daugavpiļs Muzykys vidusskūlys studiju programys „Teātra māksla” 1. kursa.
Nuokamuos sezonys suokumā daugavpilīši pīsadaleisīs storptautiskā teatra festivalā Traķūs ar īstudiejumu „Vyspyrms beja…”. Bet muojuos Daugavpiļs teatra skateituojus gaida jaunas izruodes Georgija Surkova i Ivara Lūša režijā, sovukuort jaunuokuo paaudze varēs baudēt Māra Korsieša īstudiejumu latgaliski.
Daugavpiļs teatra kolektivs soka sirsneigu paļdis skateituojim par atsauceibu vysā aizvadeituos sezonys garumā i jau ar napacīteibu gaida jaunu sasatikšonūs septembrī.
Bilešu īprīkšpuordūšona septembra izruodem suoksīs tyvuokījā laikā. Lyudzom sekuot jaunumim teatra muojislopā!
Foto: Džeina Saulīte