Oktobra videjā nedeļī Daugavpiļs teatrī cīmuojās britu aktīrs, režisors, aktīrmeistareibys i skotuvis runys pasniedziejs Pols Gudvins ( Paul Goodwin). Vizitis laikā jis daliejās sovā profesionalajā pīredzē ai teatra aktīrim – gon štatā sastuovūšīm, gon tūpūšīm, - i pīduovuoja skateituojim unikalu īspieji nūsavērtīs juo monoizruodi „Makbets”. Ai Daugavpiļs aktīrim Pols Gudvins turpinuos sasadorbuotīs, i nuokūšgod teatris ai juo leidzdaleibu īstudēs Šekspira tragediju „Makbets” originalvolūdā.
Pasateicūtīs Vaļsts Kulturkapitala fonda atbolstam, šūgod Daugavpiļs teatrī varēja nūtikt vairuokys Pola Gudvina vadeitys meistarklases, kuru laikā aktīri analizēja Šekspira lugu „Makbets”, izkūpe skotuves runu i kusteibys. Polam Gudvinam ir bogoteiga pīredze dorbā ai aktīrim, kam angļu volūda nav dzymtuo – jis struoduojis meistarklasēs Indijā, Italejā i Krīvejā. Gudvins uzskota, ka Šekspira teksti, prūtams, ir izaicynuojums angliski narunojūšim aktīrim, tuopēc juo pyrmīs i golvonīs uzdavums – izravēt bailis nu leluo dramaturga volūdys: „Akcents munā skatiejumā ir mozsvareigs. Byutiskuok panuokt, lai aktīri saprostu izrunuotū i tāluotūs varūņu reiceibys motivaceji. Šekspira teksts ir psihologiska drama, realisms, kuram ikvīns aktīrs var emocionaly pīsaslēgtīs i taidā veidā nūnuokt leidz tāla reiceibys izpratnei. Turkluot maņ dorbs ai angļu volūdā narunojūšim aktīrim pateik ari dēļ tuo, ka jīm nav tuos brytus apgryutynūšuos ai Šekspira autoritati saisteituos milzeiguos bagažys. Leidz ar tū daudz vīgluok atmest vysu līku i īsamuoceitīs kūnavīn jaunu.”
Aktrises Natalijas Kotonas īspaidi pēc daleibys Pola Gudvina meistarklasēs: „Tei ir vīnreizeja pīredze - gon dzierdēt Šekspira tekstus originalvolūdā nu angļu volūdys nesēja, gon apgivt padziļinuotu izpratni. Bez šaubom, „Makbets” kai skotuves materials myusim beja pazeistams, tūmār meistarklašu nūrisēs sacynuojam, ka idealy iztulkuot Šekspiru nav īspiejams – puorlīkūt cytā volūdā, naizbāgami izgaist daļa orginalteksta jāgys. Sovu redziejumu Pols Gudvins izkluosta cīši aizrauteigi i saprūtami. Tys myusim paleidz labuok izprast „Makbeta” varūņus i teksta byuteibu.”
Sovu oktobra viziti Daugavpilī Pols Gudvins nūslēdza ai „Makbeta” monizruodi, kurai pats ir gon režisors, gon dramatiskuo materiala redakcijis autors, sovukuort uzvaduma muzykalū nūformiejumu veidoja komponists nu Ukrainys Dmitrijs Saratskis ( Dmytro Saratsky). Izruodē Pols Gudvins izspēlēja Makbeta īkšējū konfliktu: miļzeigu vielmi nūturēt sovuos rūkuos varu, izmysumu, paranoiskys baiļis nu sakouvis i napruotā dzanušū vaiņis apziņu. Pēc izruodes cīmeņš atzeimēja, ka izruodē satyka nūteikušū uzmaneigi tverūšu skateituoju, i pasateicēs par syltū uzjemšonu. Jemūt vārā skateituoju atsauceibu, sovys nuokamuos vizites laikā 2023. goda pavsarī Pols Gudvins labpruot otkon nūspēlēs „Makbetu” uz Daugavpiļs teatra skotuves.
Pola Gudvina meistarklases Daugavpiļs teatrī nūtyka ai Vaļsts Kulturkapitala fonda atbolstu.