.jpg)
1. oktobrī Daugavpiļs teatrī pīdzeivuoja pyrmizruodi mistiskuo drama „Latvīšu šausmu stuosti” ( režisors G. Surkovs) – uz muokslinīka Andra Eglīša kūkā tārptuos skotuves sveču gaismā atsadzeivuojās seši veļu laikam pīmāruoti stuosti par sastikšonūs ai puordabiskū i naizskaidrojumīm nūtykumim. .
Izruodes ideja pīdzyma, režisoram Georgijam Surkovam najauši īraugūt literaturys zinuotneicys Bārbalas Simsones sastuodeitū gruomotu „Latvīšu šausmu stuosti”, kur apkūpuoti pādējā symtgadī topušī latvīšu autoru saceriejumi šusmu žanrā. Īstudiejumam režisors atlasēja sešus – „Engures kopsātys zyluo zuorku stuostu”, kur viesteits par vairuokim mistiskim atgadiejumiem pījyurys mīsta apleicīņi, Mirdzas Bendrupes „Helenu” – par Mīra īlys Lelījūs kopūs sastūpamu i jaunim veirīšim beistamu nūslāpumainu byutni, Aleksandra Grīna „Klusūs cīmeņus”- par latvīšu strēlnīka sasatikšonūs ar būjā guojušajīm kara bīdrym i „Vecaru Indrika dzeives stostu”, kur Zemgales lelkunga īpašumūs bīdējuši pasaruoduos rogonys, Viestura Reimerta „Spīgeli” – par senuos mebeles atspulguojumā slāptom brīsmom i Vladimira Kaijaka „Viziju” – par mīļuota cylvāka nūslāpumainu pazušonu nakts malnumā.
Veidojūt izruodi, režisors Georgijs Surkovs sacynuoja, ka latyvīšu šausmu stuosti patīseibā nav nimoz tik bīdejūši. Turkluot viestiejumuos puordabiskīs na vīnmār īsarūnās ai ļaunu nūlūku, ar mistiskū bīži var na tikai sadzeivuot, bet pat sasadraudzētīs. I vēļ – lai cik nūslāpumaini i spūkaini byutu stuostu apstuokļi, nikas nanūteik bez cylvākim i jūs sovstorpejuom attīceibom.
Gruomotys „Latvīšu šausmu stuosti” sastuodeituoja Bārbala Simsone bija pyrmizruodes skateituoju pulkā i labpruot dalējās īspaidūs: „Ziņa, ka Daugavpiļs teatrī īstudēs sešus kruojuma dorbus, cīši patekami puorsteidza – izlase, munupruot, nabeja seviški īvāruota i stuostu formats nav skotuvei pateiceigs. Tūmār režisors teicami tyka golā, atlaseidams taišņi taidus stuostus, kuri dūd prīkšstotu par tū, kas latvīšus visvairuok bīdej. Grybu paslavēt aktīrus, kuri samārā eisā laika pūsmā izspielej tik dažaidus sižetus – gon smeldzes motivu pylnūs Aleksandra Grīna „Klusūs cīmeņus”, gan uz skotuves mozlīt komiski pasnāgtū „Viziju”.”
Izruodes „Latvīšu šausmu stuosti” scenografiju veidoja muokslinīks Andris Eglītis, muzykalū nūformiejumu – komponists Platons Buravickis. Izruodes kostimu muokslineica – Inga Bermaka, gaismu muokslinīks.
Uzvadumā spielej: Zanda Mankopa, Agnese Laicāne, Jūlija Ļaha, Kristīne Veinšteina, Egils Viļumovs, Ritvars Gailums, Marģers Eglinskis, Kārlis Tols, Artjoms Afanasjevs, Miroslavs Blakunovs, Jevgeņijs Mihailovs, Raimonds Paegle.
Nuokamuo izruode – 6. novembrī pl. 15.00.
Biļetes: Daugavpiļs teatra kasē ( 654 26520), „Biļešu paradīze” kasēs, taipat internetā www.bilesuparadize.lv
Foto: Džeina Saulīte