Muzykala puosoka pīaugušīm par syuncīmīšu breinumainū ceļuojumu pa Eiropu, meklejūt patīseibu par Laimes Luoci. Izruodē kūpā ar Daugavpiļs teatra aktīrim – Ilona Bagele, Jānis Jarāns, Dainis Skutelis, Atis Ieviņš, Alisa May.
Dzeive Syunu cīmā brīsmeiga: snīga koponys i māslu čupys da jumtu, bārnim kaseklis, prusaki bierst iedīņī. A pi nadīnom vaineigs nazkod te čigonu voduotīs luocs: kai jis, par kauč kū naapmīrinuots, borgi nūryuce, tai suocēs nalaimes. Vīneiguo izeja – tū zvieru atvest i pīlabynot, tod Syunu cīmā suoksīs zalta laiki. Tikai kur Laimes Luoci meklēt i kam juo atvešona pa spākam? Veiri tok dorbūs uorzemēs, a sīvom obejis rūkys kreisuos. Labi, ka treis brašys latgalītis pīkreit gluobt Syunu cīmu nu izniceibys. Nu, kai jau puosokuos pījemts, naparosts gon Laimes Luoča pādu dzeišonai izmontuotīs transports, gon cylpojums pa Eiropu: Pūleja, Vuoceja, vysaidi breinumi Amsterdamā. Varētu dūmuot, ka dzimtenē mīreigi gaida Luoča mekleituojus. Kas tū deve! Divejis nagodnys buobys ceļ namīrus i grib vaļdēt. Voi braucieji paspēs atsagrīzt, pyrms Syunu cīmā pastruoduoti grāka dorbi, i voi atvess gaideitū Laimes Luoci?... Itymā puosokā senatne it cīši blokūs tagadnei i teiksmu breinumi pavysam tycami sadzeivoj ai myusdīnom. I vēļ: ka labi padūmoj, to vyss uz skotuves radzamais varēja nūtikt gon senūs, gon pavysam na tik senūs laikūs…
Īstudējumā pīsadoluos Daugavpiļs teatra dejuotuoju trupa