Itymā pīdzeivuojumā školānus pavadeis diveji puorsoku tāli – Plykspuorneits i Vabaleite. Školys klase puortaps par teatra skotivi, sovpus bārni paleidzēs izbūrt puorsoku ainys, puortūpūt par baileigim začim, čabūšu mežu, burbuļojūšu muorku, par sauli i mienesi, lelu zivi i jiuru. Kūpā ar puorsoku varūnim jī vuiceisīs latgalīšu volūdu, dzīduos dzīsmis i īpasazeis ar teatra muokslys elementim.

Izruodis ilgums ir 40 min, tei paradzāta školānim nu 1. da 3. klasei. Izruodē mejās latvīšu i latgalīšu volūda, kas tū padora daīmamu sevkuram interesentam.

Izruode teik spālāta klasis telpā na vaira kai 30 školānu auditorejai, tuos nūtikšonai ir vajadzeigs projektora ekrans i magnetiskuo tāfele.

Par izbraukumim i vareibu redzēt izruodi školānu grupom sasazynojit ar mums, rokstūt iz e-postu marketing@daugavpilsteatris.lv.

‍