Vyss suocās ar tū, ka vosorys pyrmajā dīnā mama, tēte, Annī i Aurēlija īsavuoc sorkonā sātā, kurā nūslāpumainūs apstuokļūs vyss pagaist. Na tik zečis, skryuvis i būrtneicys... Kaidu dīnu pagaist pat mama! Tok kurs atrass mamu, ka mama ir tei, kas vysu vysod atrūn? Izmaklātuojs-japuoņs steidz saimei paleigā i lyudz stuosteit vysu nu pošu suoku.

Izruodis pamatā ir Andrys Manfeldis gruomota bārnim “Voi mama sātā?”, kura 2024. godā tyka nomināta Latvejis Literaturys goda bolvai kategorejā “Lobuokais literaturys autordorbs bārnim”.

“Andrys Manfeldis “Voi mama sātā?” ir humora pylns i gūdeigs viestejums, kū gribīs saukt par mīlesteibys viestuli vysom mamom – tom realajom, eistajom i drupeit nu vysa pīkusušajom.” /Aija Bremšmite, gruomotu apskatneica/

Izruode īsokama bārnim nu 4 da 12 godu vacuma.

Pyrmizruode - 2024. goda 26. septembrī

‍

‍