“Itymā dorbā ir cīši interesanti i ospruoteigai apspālāts, kai kači varātu myus uztvert i kū dūmuot, nūsaverūt iz myusu dzeivi. Kasdīnā mes bīži varim nūvāruot, ka kači uzavad tai, it kai byutu sātys eistī saiminīki, eipaši naizruodūt dasagiušonu. Tok ari kačam ir svareigai, kab jū īlaiž sirdī, koč i nu molys tys tai na vysod izaver. Par tū ari ir itys stuosts – par mīlesteibu i dzeivinīka uzticeibu,” stuosta režisors Māris Korsiets, kurū ar Lenys Divani dorbu, leidzeigai kai ar gruomotu “Dzeive iz ladusskapa durovom”, kurū jis īstudēja 2022. godā, īpazeistynuoja juo meita.

‍

Monoizruode “Kača memuari” ir humora i soldonsiereigu šaļtu pylns stuosts par izdūmys boguota kača pīredzi sova cylvāka pīradynuošonā. Izruodis varūnei itei ir jau septeituo dzeive, i jei ir styngrai apsajāmuse tū naiznīkuot. Viļteiba, rūtaleigums, speits i mīleigums – ceiņā par vītu cylvāka sirdī vysi leidzekli ir vīnleidz lobi. Vēļ vaira deļtuo, ka itei sirds pīdar rakstneicai, kura varātu īmyužynuot jū kaidā nu sovu gruomotu. Varūne ļaun izradzātajim īsavērt sovys septeituos dzeivis skaistuokajuos dīnuos i izaicynūšuokajuos nadīnuos, pi reizis deveigai dolūtīs kaču gudreibuos. Vīna nu itaidu gudreibu viestej, ka laiks, kas pavadeits kūpā ar kaču, nikod nav iznīkuots veļteigai.

‍