Vīsizruodis Valmīrā Daugovpiļs teatris atkluos 5. februarī 18.30 stuņdēs ar izruodi “Nūdzeitus zyrgus nūsaun”, kura ir nomināta Dejis bolvai kategorejā “Myusu dīnu deju īstudiejums voi nūtikšona”. Izruode viestej par liktineigom izalaseišonom, ceiņu ar sovom vuojeibom i napuorvaramim apstuoklim, tamā pīsadola gondreiž vysa teatra trupa, varēs redzēt dejis, skotivis kusteibys, vokala i akterspēlis sintezi.
Izruodis pamatā ir amerikaņu rakstnīka Horasa Makoja romans “Nūdzeitus zyrgus ari nūsaun, nui?” (They Shoot Horses, Don't They?), kura radeišonu īdvasmuoja realys nūtikšonys Amerikā Leluos depresejis laikā, kod tyka pīdzeivuots naciļvieceigu deju maratonu bums. Krize īdzyna cylvākus izmysumā, i suocēs sarežgeita ceiņa par izdzeivuošonu. Sovutīs deju maratoni, kuri varēja ilgt mienešim, palyka par vīnu nu peļnis olūtu, tok reizē ari par nažieleigu puorbaudejumu ar puoruok augstom likmem.
.jpg)
Kai atzeimej rodūšuo komanda, itei izruode nav par deju kai taidu, tys ir stuosts par cylvāka īškejū spāku i vuojeibom, kuruos eipaši spūdrai izapauž sarežgeituos situacejuos. Izruodis horeografe i libreta autore ir Irina Bogeruka, muokslinīcyskais vadeituojs – Olegs Šapošnikovs. Izruode paradzāta skateituojim nu 16 godu vacuma. Ilgums – 1 stuņde 50 minutys (divejūs cielīņūs).
Sovutīs 6. februarī 11.00 i 13.00 stuņdēs jaunuokūs skateituojus sagaida jautrys i muzykals detektivs “Sorkonuos sātys nūslāpums” Lienys Šmukstis režejā. Izruodis pamatā ir Andrys Manfeldis gruomota “Voi mama sātā?”, kura tyka nomināta Latvejis Literaturys goda bolvai kategorejā “Lobuokais literaturys autordorbs bārnim” i tyka raksturuota kai “mīlesteibys viestule vysom mamom”.
Kod mama, saimis centraluo ass, vysa saturātuoja, vysu atbiļžu zynuotuoja, pagaist, saime saīt kūpā i giunās pi mistiskuos pagaisšonys izmekliešonys. Meitys Annī i Aurēlija, tēte, dzeds, kurs ari vysod nazkur pagaist, obeji sovvaļnīki kači i pat speciali itai lītai pīsaisteitais izmaklātuojs-japuoņs - vysi kūpā suoc škatynuot pādejūs dīnu nūtikšonys, kab dabuotu atbiļdi iz vaicuojumu – kur tod pagaisuse mama? Trikmīņs ar interesantom beigom – tai eisumā raksturoj izruodi režisore. Jautrais detektivs īsokams bārnim nu 4 da 12 godu vacuma. Ilgums - 1 stuņde 10 minutys.
Biletus var nūpierkt teatra kasē voi sevkurā “Biļešu paradīze” kasē i www.bilesuparadize.lv.
