Izruode viestej par tū, kaidu ītekmi iz attīceibom pamat poša pruotā izceineituos voi pagaisynuotuos ceinis. Puors īsarūn naseņ dabuotā, dobys paplūseitā sātā, kura atsarūn koč kur nakurīnis vydā. Beidzūt jī ir kūpā, diveji viņ, tuoli paceli nu vysu. Tok pruotu suoc tārpynuot namīreiga dūma, ka kaids varātu atīt, i dūmuotuos mīra ūstys iudiņus saleigoj bailis. Kaids eistyn atīs. I izviļks vierspusē tū, kas da ituo bejs nūglobuots. Nauzticeibu, nadrūseibu i greizsirdeibu.
“Fosis lugu teksti ir cīši sovpateigi, tei nav parosta proza voi dzeja. Nasaverūt iz acimradzamu ituos lugys dziļū psihologismu, mes kūpā ar akterim skaitom, ka tī ir īkodāts ari filosofisks saturs, kurū var nūlaseit, tik atšifrejūt simbolus, kurūs mes tī saskatejom. Ituo teksta simboliku mums izadeve interpretēt, izmontojūt Zigmunda Freida i Karla Gustava Junga teorejis,” stuosta izruodis režisors Olegs Šapošnikovs.
Juna Fosis dorba tikšona Daugovpiļs teatra repertuarā nav najaušeiba. Oktobrī nūtiks Zīmeļvaļstu dīnys Daugovpilī, i Zīmeļvaļstu Ministru padūmis birojs Latvejā, aicynojūt īsasaisteit Daugovpiļs teatri, pīduovuoja ideju īstudēt kaidu nu Juna Fosis dorbu. Fose roksta sovus dorbus jaunnorvegu volūdā (nynorsk), kurū leidzeigai kai latgalīšu volūdu kasdīnā lītoj nalela sabīdreibys daļa. Leidz ar tū īstudiejums “Kaids nūteikti atīs” ir sūļs iz tū, kab byuvātu tyltu storp jaunnorvegu i latgalīšu volūdu i tūs nesiejim, kurūs vīnoj gribiešona saglobuot, kūpt i atteisteit volūdu. Īstudiejums “Kaids nūteikti atīs” tūp ar Norvegejis Karalistis viestnīceibys Latvejā i Zīmeļvaļstu Ministru padūmis biroja Latvejā paleigu.
Izruodis rodūšū komandu veidoj scenografe i kostimu muokslineica Inga Bermaka, kusteibu muokslinīki Vladimirs Goršantovs, Darja Turčenko i gaismu muokslinīks Sergejs Vasiļjevs. Lugu latgaliski tulkuojuse Jūlija Tumanovska. Izruodē pīsadola: Zanda Mankopa, Līga Ivanova, Marks Šelutko, Māris Korsiets, Ritvars Gailums, Egils Viļumovs, Vladimirs Goršantovs, Darja Turčenko.
Pyrmizruode - 16. oktobrī 18.30 stuņdēs, nuokušuo izruode – 17. oktobrī 18.30 stuņdēs.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
