“Pi klusim iudinim” ir Regīnys Ezerys stuostu īstudiejums Lienys Šmukstis režejā. Tī ir četru sīvīšu stuosti par nūmūdu i sapynim, mīlesteibu i vīntuleibu, kuri, kai atzeimoj aktrisis, nūteikti atsabolsuos sīvīšu sirdīs, kam kotrā nu tūs ir lela varbyuteiba saredzēt ari sovys dvēselis atspulgus.
Kaids nūpublicāts stuosts izdzan varūnēs atminis par nūtikšonom pi azara, pi kura klusajim iudinim juos vysys kūpā beja nazkod aizalaidušs. Kaida tī devēs, kab izarautu nu sovys kasdīnys, kaida, kab izalyktu, ka nikas nav puorsamejs, cyta, kab otkon pabyutu tyvumā cylvākam, kuru mīļoj. Kotra itamuos puors dīnuos kluseibā izdzeivuoja sovu naapjaustū suopi, ar kurū niu ir gotova pasadaleit.
“Vysā kruošņumā atsakluoj kotrys raibais i nagludais īškejais pasauļs, vīntuleigai eksistencialys steigys par sovu vītu dzeivē i nūdzeivuotūs godu lītdereibu… Kotra poša par sevi – truopeigs i reizē skumeigs viertiejums par cylvāka vītu pasaulī, kam tok byutu juosatur iz sapratnis sovā vydā i leidzjiuteibys saitem,” recenzejā roksta teatra kritiks Tuoms Čevers.
Itei ir staigojamuo izruode – skateituoji tiks sadaleiti grupuos i īs gostūs pi kotrys varūnis, kab uzklauseitu juos stuostu. Kotrai grupai itys stuosts golā veiduosīs vīns, tok jī pīdzeivuos tū vysaiži, kam suoks ar cytu skotpunktu.
Regīnys Ezerys stuostu dramatiziejumu taiseja Agnese Rutkēviča, izruodis scenografs ir Raimonds Vindulis, kostimu muokslinīks – Gatis Timofejevs, gaismu muokslinīks – Sergejs Vasiļjevs. Lūmuos: Inese Ivulāne-Mežale, Agnese Laicāne, Liena Šmukste, Kristīne Veinšteina. Izruode latvīšu volūdā, ilgums – 2 stuņdis 15 minutys.
Bileti: „Biļešu paradīze” kasēs i škārsteiklā www.bilesuparadize.lv.