Daugavpiļs teatrī pošlaik nūteik komedijis „Pamatnūteikumi” īstudiešona. Pyrmizruode byus 7. majā. Izruodes režisors – Gatis Šmits, kuram itys ir pirmīs dorbs Daugavpiļs teatrī, sovukuort vīnā lūmā kai vīsmuokslinīks pīpulcynuots aktīrs Kaspars Zāle.

Izruodes pamatā ir britu scenarista i dramaturga, komediju žanra meistara Ērika Čapela (Erick Chapell) luga, kuru latviski iztulkojs Gatis Šmits. Luga ai soldsiereigi komisku skatīni mudynoj pasavērtīs uz pusmyuža cylvāku dzeivi, līk aizadūmuotīs par sapņim, kaisleibom, ilgom i daudzom cytom emocijom, kurys pakuopeniski pagaist ilgstūša pīroduma attīceibuos.

Džerijam i Džudeitei ir apskaužama lauleiba. Veirs – veiksmeigs beiznesā, sīva – profesionala attīceibu konsultante. Obeju ilggadeiguos kūpdzeives nūslāpums atrūnams dažūs pamatnūteikumūs – ai cīneibu izaturētīs pret partnera privatū telpu i naapsmīt ūtra vuojeibys. Puorlīcynuoti, ka taida sapruoteiga pīeja lauleibai ir paraugs cytim, kaidā vasorys naktī Džerijs i Džudeite īzajaucās najauši satykta puora dzeivē. Ījūteigi dūmuotīs psihoterapijis seanss gostustobā nagaidūt puortūp puorprotumu i draudu pylnā trillerī, kas Džerijam i Džudeitei liks īdybunuot sovuos attīceibuos jaunus pamatnūteikumus.

„Bīži vīn salonkomedijis ir prostys i vīgli paradzamys iznuokumā. Bet itys ir cyts gadiejums – luga nūtur skateituoja uzmaneibu leidz izskaņai, te nav  līkvuordeibys i varūņi atsakluojās nagaideitūs veidūs. Aktīrym te ir breineigs dorba materials, kas prosa meistareibu i daudz energijis. Ka saleidzynuotu aktīra dorbu izruodē ai sliepuošonu, tod te bys kolnu slaloms. Juoatzeimej, ka vysi četri aktīri ar sovu uzdavumu golā teik speidūši,” soka režisors Gatis Šmits.

Izruodē „Pamatnūteikumi” spielej Jūlija Ļaha, Marģers Eglinskis, Zanda Mankopa i Kaspars Zāle.

Pyrmizruode – 7. majā plkst. 17.00; nuokamuo izruode – 19. majā plkst 18.30.  

Beleti: Daugavpiļs teatra kasē ( 654 26520), „Biļešu paradīze”kasēs, taipat internetā www.bilesuparadize.lv.

‍