Dorisys i Džordža skatīni sasateik, i jī naspiej stuotīs preteimā nagaideitai izlīsmojušajom jiutom. Koč i obeji ir laimeigai preciejušīs ar cytim cylvākim, jī saprūt, ka obejus vīnoj kas eipašs, i vīnojās sasatikt ari cytugod. Tai suocās jūs naparostuo meilys dāka, kas iztur laika puorbaudi vaira nakai divdesmit godu garumā.
Īstudiejums baļsteits kanadīšu dramaturga i kinoscenarista Bernarda Sleida taida poša nūsaukuma lugā (1975), kuruos pyrmīstudiejums Brūksa Atkinsona teatrī palyka par Brodvejis sensaceju. Sleids par itū dorbu sajēme “Drama Desk Awards” bolvu i tyka nomināts Tonija bolvai. 1978. godā itei luga tyka ari ekranizāta. Herberts Laukšteins itū lugu īstudej jau ūtrū reizi, i obejis reizis giutīs pi ituo materiala mudynuojušys puordūmys par vierteibom, kas palīk namaineigys pat namīreiguokajūs laikūs.
“Izruodis darbeiba nūteik Kalifornejā i apgiun laika pūsmu nu 1951. da 1975. goda. Tymā laikā tyka pīdzeivuotys vysaidys puormainis i satrycynuojumi – turpynuojuos diveju lelvaru ceiņa Korejā, suocēs Soltais kars, Vjetnamys kars, nūtyka studentu namīri, seksualuo revoluceja, rokenrola i narkotiku izplaukums. Ari 1991. godā, kod īstudieju itū lugu pyrmū reizi, nūtyka byutyskys puormainis – sabruka PSRS, tyka nūjaukts Berlīnis myurs. Taipat ari niu – mes dzeivojam strauju puormaiņu laikā, naziņā par reitdīnu, labilā stuovūklī, kas vīnnūzeimeigai pamat īspaidu iz cylvākim. Bet ir ari koč kas piļneigi namaineigs vysūs laikūs – diveju dzymumu tīksme vīnam pret ūtru. Mīlesteiba ir tei, kas palīk i paleidz izturēt leluokuos vātrys,” stuosta režisors.
Lūmuos: Aleksandrs Komarovs i Natālija Kotona. Izruodis rodūšū komandu veidoj režisors Herberts Laukšteins, scenografs Ivars Noviks, kostimu muokslinīks Gatis Timofejevs, gaismu muokslinīks Sergejs Vasiļjevs. Izruode byus krīvu volūdā ar tulkuojumu latvīšu volūdā titrūs.
Pyrmizruode – 4. aprelī 18.30 stuņdēs, cytys izruodis – 12. aprelī 18.00 stuņdēs, 10. majā 18.00 stuņdēs.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
