Paguojušajā sezonā itū komedeju īstudēja i tamā kūpā ar Jūliju Ļahu pīsadaleja režisors i akters Ivars Lūsis. Tei beja mīlesteibā radeita izruode, kura skateituojim tyka nūspālāta viņ divejis reizis. Jemūt vārā skateituoju pīprasejumu i kolektiva gribiešonu turpynuot ituos izruodis skotivis myužu, tyka nūlamts atjaunuot izruodi, taidā veidā gūdynojūt myužeibā aizguojušū muokslinīku. Atjaunuotuos versejis pyrmizruodei ir izalaseits zeimeigs datums - 14. februars, kas ir na tik vysu meiļuotuoju dīna, bet ari Ivara Lūša dzimšonys dīna.
Zīmys vokors, jau vairuokys dīnys plūsuos spieceigs viejputnis. Itaidūs apstuokļūs izīt nu sātys nūzeimātu pakļaut sevi nuovis brīsmem. Tok ari palikt pavysam vīnam nūmaļā sātā var izaruodeit beistamai. Kaida aizdūmeiga byutne mierktīceigai lovuos puori koponom preteimā gunei lūgā lauka ūtrā golā. Tymā pošā laikā Patriks bauda mīru i klusumu sovā vacpuiša miteklī, nimoz nanūjaušūt, ka tiuleņ atspruogs durovys i vīsuļs vuordā Džudīte īsabruozs juo sātā.
Izruodis pamatā ir angļu dramaturga Pītera Kviltera 2020. godā pīraksteituo luga “Snowbound”, kura topa “lokdauna” aba siediešonys sātā laikā. Tuos šaļts apstuokli rūsynuoja autoru pasavērt ar humoru iz situaceju par pret pošu grybu vīnā sātā īsprūstuotim cylvākim. Komedeja “Snīga giustā” ir aizkustynūšs i nagaideitim atkluojumim boguots stuosts par divejom vīntuļom sirdim, kuruos pamozam atmaigst, cikom aiz lūga plūsuos nažieleigs viejputnis. Koč i izruode ir defināta kai komedeja, skateituojus sagaida plaša emoceju gamma.
Atjaunuotajā versejā pīsadaleis akteri Ritvars Gailums i Jūlija Ļaha. Izruode latvīšu volūdā. Ilgums – 2 stuņdis 30 minutys.
14. februarī 18.30 stuņdēs, 23. februarī 15.00 stuņdēs.
Bileti: Daugovpiļs teatra kasē (654 26520), „Biļešu paradīze” kasēs i škārsteiklā www.bilesuparadize.lv.
