Četrys vysaidu raksturu sīvītis stuosta par vīnu i tū pošu nūtikšonu – kaids publicāts stuosts roda varūnem atminis par nūtikšonom pi azara, pi kura klusajim iudinim juos vysys kūpā beja nazkod davušuos. Kaida tī devēs, kab izarautu nu sovys kasdīnys, kaida, kab izalyktu, ka nikas nav mainejīs, cyta, kab otkon pabyutu tyvumā cylvākam, kuru mīļoj. Tok azara klusī iudini naspēja snēgt atbiļdis iz vysim vaicuojumim, kurūs juos sev aizdeve. Kotra nu jūs itamuos puors dīnuos kluseibā izdzeivuoja sovu naapjaustū suopi, kura beja palykuse jimuos, ari publicātuo stuosta autorei.
Režisore Liena Šmukste stuosta: „Ideja īstudēt Regīnys Ezerys stuostus atguoja spontani, i tei patīseibā pīdar Agnesei Rutkēvičai. Maņ ruodejuos, ka Ezerys stuosti teatrī seņ nav bejuši, i gribiejuos tūs „paceļt viersā”. Jei ir breineiga autore, i asu prīceiga caur itū izruodi baudeit juos volūdu. Ezerys stuosti uzrunoj ar vīglumu, ar kuru jei roksta par dīzgon skaudrim sīvīšu liktinim, kluotyn vēļ ni šaļti napagaisynojūt humora davu. Juos stuostu varūnem nikod nav nūlaists daguns, juos vysod īt ar smaidu, iz vysu verās ar nalelu ironeju. Myusu izruodis stuostus caurvyn mīlesteibys tema, tī ir par gribiešonu mīļuot i byut mīļuotai.”
Kotrai izruodis varūnei byus atvālāta atseviška telpa teatrī, kurā daleitīs ar sovu stuostu par mīlesteibu, vīntuleibu i sapynim i ar kotrys atmiņom par kūpeigai pavadeitajom dīnom pi azara klusajim iudinim. Leluokajā daļā nu itūs teatra telpu izruodis vēļ nikod nav spālātys, leidz ar tū skateituoji tiks pi vēļ nabejušys pīredzis. Varūnis daleisīs sovūs stuostūs teatra pyrmuo i ūtruo stuova foaje, muokslinīku i butaforu darbneicā i eksperimentalajā skotuvē. Pyrma izruodis skateituoji tiks sadaleiti grupuos, i piec kotra stuosta nūsavieršonys jim byus juopuorīt iz cytu spēlis laukumu, tymā skaitā byus juokuop iz 4. stuovu.
„Skateituojs īs gostūs pi kotrys varūnis, kab uzklauseitu juos stuostu i izzynuotu, kaidys emocejis i puordzeivuojumi kluseibā mutuļoj juos dvēselis dzeilēs. Kotrai grupai itys stuosts golā veiduosīs vīns, tok jī pīdzeivuos tū vysaiži, jo suoks ar cytu skotpunktu,” dasoka režisore.
Izruodis „Pi klusim iudinim” scenografs ir Raimonds Vindulis, kostimu muokslinīks – Gatis Timofejevs, gaismu muokslinīks – Sergejs Vasiļjevs. Lūmuos: Inese Ivulāne-Mežale, Agnese Laicāne, Maija Korkliša, Kristīne Veinšteina. Izruode latvīšu volūdā.
Pyrmizruode – 28. oktobrī 18.00 stuņdēs, nuokušuos izruodis – 29. oktobrī 15.00 stuņdēs, 22. decembrī 18.30 stuņdēs.
Bileti: Daugovpiļs teatra kasē (654 26520), „Biļešu paradīze” kasēs i škārsteiklā www.bilesuparadize.lv.
Foto: Džeina Saulīte
