“Gribim pasasaceit Zīmeļvaļstu Ministru padūmis biroja vadeituojam Stefanam Eriksonam, kuram pīderēja ideja īstudēt Fosis lugu latgaliski. Tok ari itys īstudiejums nabyutu īspiejams, ka pādejūs 12 godu laikā Daugovpiļs teatris nabyutu aktivai i puorlīcynūšai struoduojs ar tekstim latgaliski. Vysi myusu panuokumi, skateituoju mīlesteiba i eists latgaliskums beja saisteits ar Monikys Zīlis tekstim, kurūs jei raksteja speciali Daugovpiļs teatram. Moniku Zīli mes skaitejom par Daugovpiļs teatra muzu, myusu draugu, latgaliskuo patriotisma etalonu. Itū sasnāgumu mes gribim veļteit Monikys Zīlis pīmiņai,” sovā uzrunā rakstejs izruodis režisors, teatra direktors Olegs Šapošnikovs.

Sovpus žurejis komiseja atzeimiejuse: “Itei izruode, kas ir Nobela premejis laureata literaturā, norvegu autora Juna Fosis tulkuojums nu jaunnorvegu volūdys latgalīšu volūdā, ir daudzsluoņaina teatra izruode, eists šedevrs! Tei ir spieceiguokuo i kvalitativuokuo izruode latgalīšu volūdā. Tys ir meistardorbs pats par sevi, tok ari unikals deļ režisora redzīņa i atainuojuma, saleidzynojūt ar norvegu pošu interpretacejom.”

“Kaids nūteikti atīs” ir laikmeteiga teatra spēle latgaliski – filozofiskys trillers par pakuopeniskai pīaugūšu sprīdzi kaida puora attīceibuos i tū, cik pūstūšu vātru dvēselis dzeilēs var izraiseit baile nu svešuo i nazynamuo. Tys ir storptautyskys projekts, kurs radeits sadarbeibā ar Norvegejis viestnīceibu Latvejā, Zīmeļvaļstu Ministru padūmis biroju Latvejā i Volūdu sātu.

Tyvuokuo izruode - 11. aprelī 18.30 stuņdēs.

Foto: Dagnija Bernāne / Latgales vēstniecība GORS

‍