Zīmys vokors, jau vairuokys dīnys plūsuos spieceigs viejputnis. Cikom Patriks bauda mīru i klusumu sovā vacpuiša miteklī, kaida aizdūmeiga byutne mierktīceigai lovuos puori koponom iz juo sātys lūgu gaismys pusi. Patriks pat nanūjauš, ka tuos ir pādejuos mīra šaļts pyrma vīsuļvātrys vuordā Džudīte.
Izruodis pamatā ir angļu dramaturga Pītera Kviltera 2020. godā pīraksteituo luga “Snowbound”, kura radeita “lokdauna” aba siediešonys sātā laikā. Tuo laika apstuokli rūsynuoja autoru pasavērt ar humoru iz situaceju, kur pret pošu grybu vīnā sātā īsprūstuoti cylvāki. Pīters Kvilters atzeimej, ka itei luga jau ir cīši populara Eiropā, eipaši Itālejā, sovpus “Snīga giustā” Daugovpiļs teatrī ir pyrmais ituos lugys īstudiejums Latvejā.
.jpg)
“Es cīši seņ meklieju lugu, kura byutu pīraksteita na seņuok kai pyrma pīcu godu, kura nabyutu puorbleivāta ar puorgudru didaktiku; kura byutu cīši vīnkuorša, sirsneiga, dzeivi aplīcynojūša. Pyrma goda izadyuru itaidam breinumam i naticieju sovom acim, ka šudiņ kaids vēļ tai roksta, lobā nūzeimē,” stuosta režisors par lugys izvēli.
Komedeja “Snīga giustā” ir aizkustynojūšs i nagaideitim atkluojumim boguots stuosts par divejom vīntuļom sirdim, kurys pamozam atmaigst, cikom aiz lūga plūsuos nažieleigs viejputnis. Koč i izruode ir defināta kai komedeja, rodūšuo komanda ir puorlīcynuota, ka skateituojus sagaida plašs emoceju spektrs.
Izruodis “Snīga giustā” scenografs i kostimu muokslinīks Egils Viļumovs, gaismu muokslinīks Sergejs Vasiļjevs. Izruode latvīšu volūdā.
Nuokušuo izruode – 1. martā 18.30 stuņdēs.
Bileti: Daugovpiļs teatra kasē (654 26520), „Biļešu paradīze” kasēs i škārsteiklā www.bilesuparadize.lv.
Foto: Gatis Timofejevs
