“Teatram juobyut aktualam i juorunoj par tom problemom, ar kurom asam spīsti sadzeivuot i ceineitīs ite i niu, sovpus taišni Šekspīra “Makbets” vysvaira atbiļst ituos šaļts nagativajai situacejai pasaulī,” stuosta izruodis režisors Olegs Šapošnikovs.
Rogonu nūredziejumā apsūleituos varys soldonuo garša pamozam aptymsoj Makbeta pruotu, i, kod pyrmais duņcs ir ašņa apslaceits, atpakaļceļa vaira nav – kotrys nuokušais sūļs vierzej jū vys tyvuok preteimā poša izniceibai.
Režisors Olegs Šapošnikovs atzeimej, ka na jau rogonu burvesteibys ir atbiļdeigys par Makbeta ašņa dorbim: “Tei ir poša cylvāka izvēle – īlaist ļaunumu sevī i ļaut tam sevī plaukt voi stuotīs tam preteimā. Par tū ari ir itys īstudiejums, par īškejū ceiņu, kas kotram juoizceinej. Makbets itū ceiņu pagaisynoj.”
Izruodē puorsvorā pīsadola teatra jaunī akteri, kurim vuiceibu procesa laikā beja unikala vareiba īsadzilinuot Šekspīra dorbā i vuiceitīs lugu originalvolūdā ar britu aktera i pasnīdzieja Pola Gudvina (Paul Goodwin) paleigu. Piec meistarklašu komandai palyka skaidrys, ka “Makbets” juoīstudej originalvolūdā, jo nivīns tulkuojums naspēja nūdūt Šekspīra volūdys mageju. Ituos meistarklasis Daugovpiļs teatrī tyka eistynuotys ar British Council puorstuovnīceibys Latvejā atbolstu.
“Pa munam, ir breineigi, ka Daugovpiļs teatris snādz vareibu jaunajim aktierim vuiceitīs i īsadvasmuot nu pasauļa pīredzis. Prīca, ka variejom snēgt sovu īguļdejumu, atbolstūt britu aktera i Šekspīra pietnīka Pola Gudvina meistarklašu nūtikšonu Daugovpilī. Itei pasauļa elpa beja jiutama ari izruodē, – nūviertieju izruodis rodūšuos komandys dorbu, veidojūt myusdīneigu “Makbeta” interpretaceju, kai ari jaunūs akteru drūsmi i uzjiemeibu, īdzeivynojūt Šekspīra volūdu iz teatra skotuvis tuos originalajā formā,” piec pyrmizruodis apmekliejuma sovūs īspaidūs dalejuos British Council puorstuovnīceibys Latvejā vadeituoja Zane Matesoviča.
Rodūšuo komanda aicynoj skateituojus nasabeit nu angļu volūdys – nūteikūšuo izpratnē tekstam itūreiz nav nūteicūšuo lūma. Šekspīra ailis boguotynoj izruodi ar magisku melodiku, tok varys apdullynuota pruota nūstyurūs skateituoji īsaver ari ar akteru kermiņa volūdys i atmosferiskys muzykys starpnīceibu.
“Ka pat skateituojs nav skaitejs “Makbetu”, sevkurā gadīnī tū īškejū tymsū atmosferu, kū dūd itei izruode, jis spēs sajust. Tok itei izruode dūd ari nūceju, ka nu ļaunuma var izaraut,” stuosta aktrise Vanda Gibovska, kura izruodē attāloj vīnu nu rogonom.
Makbeta lūmu izpylda Miroslavs Blakunovs, puorejuos lūmuos: Artjoms Afanasjevs, Eduards Beļnikovs, Vanda Gibovska, Aleksandra Koguce, Agnese Laicāne, Alisa Matvejeva, Jevgenijs Mihailovs, Svetlana Morozova, Raimonds Paegle, Luiza Prokofjeva, Milena Savkina, Darja Šakalova, Marks Šelutko, Kristina Tiško, Vladislavs Vasiļjevs, Natālija Kotona, Maksis Krilovs, Kristīna Zaharova.
Izruodis skotuvis kusteibu konsultante ir Irina Bogeruka, scenografe i kostimu muokslineica – Inga Bermaka, gaismu muokslinīks – Sergejs Vasiļjevs. Izruode ilgst 1 stuņdi 20 minutys, pīmāruota skateituojim, kas sasnāguši 16 godu vacumu. Izruode nūteik angļu i krīvu volūdā ar tulkuojumu latvīšu volūdā titrūs.
Nuokušuos izruodis – 24. novembrī, 1. i 2. februarī 18.30 stuņdēs.
Bileti: Daugovpiļs teatra kasē (654 26520), „Biļešu paradīze” kasēs i škārsteiklā www.bilesuparadize.lv.
Foto: Džeina Saulīte
