Martā Daugovpiļs teatrī varēs nūsavērt izruodi ar Čulpanu Hamatovu i Jūliju Augu

10. martā Daugovpiļs teatrī varēs nūsavērt teatra i muokslys centra ”Vaba Lava” (Igauneja) izruodi “Dzīdynuošona”, kurā pīsadola Čulpana Hamatova i Jūlija Auga. Eipaši jom lugu pīrakstejs Mihails Durnenkovs, i pasauļa pyrmizruodi Elmāra Seņkova režejā tei pīdzeivuoja 3. decembrī Tallinā.

Kod nagaideitai mierst labdareibys fonda “Dzīdynuošona” dybynuotuojs, vysa atbiļdeiba gulstuos iz juo meitys Annys (Jūlija Auga) placu. Labdareibys fonda puormontuošona nav vīneigais pagrīzīņa punkts juos dzeivē. Dreiži viņ pasaruoda pietnīcyskuo žurnaliste Soņa (Čulpana Hamatova), kurai ir aizdūmys, ka labdareibys organizacejis veiksmeiguos darbeibys pamatā bejuse kruopšona.

‍

Atsakluojūt vys jaunim nūslāpumim, dreiži palīk skaidrys, ka Sonis motivi ir daudz personiskuoki. Juos nūdūms ir iznycynuot vysu, kas Annai duorgs. Ar kū beigsīs obeju sīvīšu emocionaluo konfrontaceja? Voi itei sasadūršona nūvess pi sabrukuma, voi ari ir cereiba iz attīceibu atsajaunuošonu?

‍

Mihaila Durnenkova aizraunūšuo luga “Dzīdynuošona” ir pylna nagaideitu paviersīņu i puorsteigumu. Režisors – Elmārs Seņkovs. Dramaturgs – Mihails Durnenkovs. Muokslinīks – Reinis Suhanovs. Producents – Merts Meoss. Projekta vadeituojs – Serafima Kolodkina. Gaismuotuojs – Prīdu Adlass. Muzyka – Ardo Rans Varress. Lūmuos – Čulpana Hamatova, Jūlija Auga.

Vīsizruode nūtiks Daugovpiļs teatra Lelajā zālē 10. martā 18.30 stuņdēs. Izruode ir krīvu volūdā ar subtitrim latvīšu volūdā. Ilgums – 1 stuņde 30 minutys.

Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.

‍