Kai tyka saceits sezonys suokuos, ciļvieceibys tema byus caurveju motivs vairuokūs Daugovpiļs teatra ituos sezonys jaunīstudiejumūs. Ari izruodis “Laime iz naža esmiņa” varūņus sagaida ciļvieceibys puorbaude – liktiņa izaicynuojums gūdpylnai pījimt nagaideitū laimastu i tuo tikpat nagaideitū pagaisšonu.
Nikolajam (lūmā – Viktors Jancevičs) i Galinai (lūmā – Žanna Lubgāne) ir uzsmaidejuse fortuna – jī laimiejuši loterejā lelu laimastu. Tok, kas vīgli īt, tikpat vīgli aizīt. Nuokušajā reitā teik konstatāts, ka laimeigais loterejis bilets ir pagaiss. Na veļti horoskops breidynuoja par lelim finansialim zaudiejumim! Suocās loterejis bileta mekliešona, i rūnās aizdūmys, ka tikū rostuos laimis zagli varātu byut tepat jim sūpluok...
“Izruode ir par kuoreibu piec naudys, kura piļneibā puorjam cylvāku. Bīži goduos, ka vēļ nasajimtuo nauda golvā jau teik iztārāta. Ari golvonī varūni jau ir izdūmuojuši, kai iztierēs sovu laimastu, ir izsapynuojuši sovu tyvuokū laiku iz prīšku. Pieški jūs sapyns par skaistū nuokūtni teik nūzogts, i jī ir gotovi sevkuram puorgrauzt reikli, kab tik tū dabuotu atpakaļ. Dzanūtīs pakaļ nu pierstu strauji izsleidūšajai laimei, jī pieški palīk par trillera cīneigim varūnim,” stuosta izruodis režisors.
Izruodis pamatā ir Vasīlija Sigareva luga, kura Daugovpiļs teatra skateituojim 2015. godā beja pyrmizruodeita latgaliski izruodē „Latgalīšu rulete”. Jaunīstudiejumā ituos lugys koloritūs varūņus izspielēs cyti akteri, atkluojūt cylvāka maineigū dobu jaunuos kruosuos. Lūmuos: Viktors Jancevičs, Žanna Lubgāne, Mihails Samodahovs, Irina Kešiševa, Aleksandrs Komarovs, Milena Savkina, Ritvars Gailums.
Izruodis režisors ir Māris Korsiets, scenografs i kostimu muokslinīks ir Egils Viļumovs, gaismu muokslinīks – Sergejs Vasiļjevs. Izruode ir krīvu volūdā ar tulkuojumu latvīšu volūdā titrūs.
Pyrmizruode – 16. martā 18.00 stuņdēs. Nuokušuo izruode – 17. martā 17.00 stuņdēs.
Bileti: Daugovpiļs teatra kasē (654 26520), „Biļešu paradīze” kasēs i škārsteiklā www.bilesuparadize.lv.
Foto: Džeina Saulīte
