Izruodis pamatā ir Bernarda Sleida luga, kuruos darbeiba nūteik Kalifornejā i apgiun laika pūsmu nu 1951. da 1975. goda, laiku, kod, leidzeigai kai niu, pasaulī tyka pīdzeivuotys lelys puormejis i satrycynuojumi. Režisoru Herbertu Laukšteinu giutīs pi ituo materiala mudynuojušys puordūmys par vierteibom, kas palīk namaineigys pat namīreiguokajūs laikūs.
“Cytugod tymā pošā laikā” ir puorsteidzūšs meilys stuosts par Dorisu i Džordžu, divejim meiļuotuojim, kuri naspieja stuotīs preteimā nagaideitai uzlīsmojušom jiutom, i, koč i obeji beja preciejušīs ar cytim cylvākim, vīnuojuos sasatikt vēļreiz. Puorsameja pasauļs, puorsameja jī poši, tok vaira nakai 20 godu garumā vīns palyka namaineigs – jūs uzticeiba tradicejai sasatikt kotru godu tamā pošā vītā i tymā pošā laikā.
.jpg)
Aktrise Natālija Kotona, kura izruodē attāloj Dorisu, stuosta: “Tys nav stuosts par vīnkuoršu meilys dāku, tok par divejim cylvākim, kuri vairuoku desmitgažu laikā palīk eistyn tyvi. Jūs jiutys nav iznycynūšys, piļneigi preteji – jī atbolsta vīns ūtru, dzīdynoj. Taišni tys duovoj itai izruodei gaišu intonaceju. Pa munam, itei izruode ir par tū, kai mes vuicomēs byut atkluoti i patīsi poši pret sevi, kai godu laikā puorsamej mīlesteiba i kai mes augam. Dorisai ituos sasatikšonys ar Džordžu palīk par saleņu, kur jei var byut jei poša i kur kaids spiej saredzēt patīsū jū. Sovutīs vīsneicys ustabeņa ir kai laika kapsula, kurā sasagloboj jūs saikne, nasaverūt iz vysom vātrom, kas nūteik uorpus tuos.”
Izruodis rodūšū komandu veidoj režisors Herberts Laukšteins, scenografs Ivars Noviks, kostimu muokslinīks Gatis Timofejevs, gaismu muokslinīks Sergejs Vasiļjevs. Lūmuos: Aleksandrs Komarovs i Natālija Kotona. Izruode krīvu volūdā ar tulkuojumu latvīšu volūdā titrūs.
Nuokušuos izruodis – 12. aprelī 18.00 stuņdēs, 10. majā 18.00 stuņdēs.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
