“Izruodis varūni ir breineiga saime, kura īsavuokuse jaunā sātā. Ar itū saimi nūteik gona sadzeivyskys lītys, tok, tai kai jūs ir daudz, vysapleik volda nalels haoss i šaļtim rūnās vysaidi puorprotumi. Tys ir sirsneigs, muzykals, dzīšmu i humora pylns stuosts ar laimeigom beigom par mamu, kura pieški pagaist. Stuosts, kurs liks aizadūmuot par saimi i pasavērt iz tū nu molys,” stuosta izruodis režisore Liena Šmukste.
Kod mama, saimis centraluo ass, vysa saturātuoja, vysu atbiļžu zynuotuoja, pagaist, saime saīt kūpā i giunās pi mistiskuos pagaisšonys izmekliešonys. Meitys Annī i Aurēlija, tēte, dzeds, kurs ari vysod koč kur pagaist, obeji sovvaļnīki kači i pat speciali itai lītai pīsaisteitais izmaklātuojs-japuoņs - vysi kūpā suoc škatynuot pādejūs dīnu nūtikšonys, kab atrostu atbiļdi iz vaicuojumu – kur tod pagaisuse mama?
.jpg)
Izruodi nūsavāruse ari dorba autore Andra Manfelde: “Maņ kai īsaisteitajai personai ir gryuši dorbu vērtēt, tok maņ eistyn redzīs, ka izruode ir izadavuse. Eipaši pateik tys, ka tei ir cīši dinamiska, tei nūtur lobu leidzsvoru storp sirsneigū i pīdzeivuojumim boguotū, tamā ir i dziļuokys šaļts, kuruos kotra mama saprass, i ari bārnim jautreibys ir bezgola. Ejit vērtīs, garlaiceigai nav nivīnu šaļti!”
Īstudiejuma “Sorkonuos sātys nūslāpums” rodūšū komandu veidoj Rūta Dišlere (dramatiziejums), Raimonds Vindulis (scenografeja), Jana Čivžele, Anna Elizabete Kasparsone (kostimi), Mikus Frišfelds (muzyka i dzīšmu vuordi), Elizabete Vindule (animaceja), Alisa May (vokaluo konsultante), Sergejs Vasiļjevs (gaismys). Lūmuos: Agnese Laicāne, Inese Ivulāne-Mežale, Kristīne Veinšteina, Jūlija Ļaha, Margers Eglinskis, Eduards Beļnikovs, Nikolajs Gedzjuns, Raimonds Paegle.
Nuokušuo izruode – 5. novembrī 12.00 stuņdēs. Izruode īsokama bārnim nu 4 da 12 godu vacuma, kai aŗi jūs vacuokim i vacvacuokim, ilgums - 1 stuņde 10 minutys.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
