“Tī ir stuosti par tū, cik mes asam styprys i tymā pošā laikā trauslys i dzilis kai azara iudiņs. Itī ir stuosti, kas īvalk sevī i ilgi nalaiž vaļā. Tī skumis sasavyn kūpā ar prīcu, laime – ar nalaimi, mīlesteiba – ar ilgom, i cylvāku liktini saplyust kūpā kai ryuči, kas satak vīnā azarā,” puordūmuos doluos režisore Liena Šmukste.
Regīnys Ezerys stuostus itam īstudiejumam dramatizējuse Agnese Rutkēviča, kurei itūs stuostu varūnis raksturoj kai īškeji trauslys, tok drūsmeigys i pošpīteikamys sīvītis. Dramaturge stuosta: “Kotrā cylvākā ir taida vīta – klusī iudini. Leluokuo drūsme ir runuot par tū, kas vysvaira suop. Tik drūsmeigys ir itūs stuostu golvonuos varūnis. Kai iudiņa dzeislys. Zalta āderis.”
Kaids nūpublicāts stuosts roda varūnem atminis par nūtikšonom pi azara, pie kura juos vysys kūpā beja nazkod davušuos. Kaida tī devēs, kab izarautu nu sovys kasdīnys, kaida, kab izalyktu, ka nikas nav puorsamejs, cyta, kab otkon pabyutu tyvumā cylvākam, kuru mīļoj. Tok azara klusī iudini naspēja snēgt atbiļdis iz vysim vaicuojumim, kurūs juos sev aizdeve. Kotra nu jūs itamuos puors dīnuos kluseibā izdzeivuoja sovu naapjaustū suopi, ar kurū niu ir gotova pasadaleit.
Itys īstudiejums ir naparosts ar tū, ka kotrys varūnis stuosts teik pastuosteits cytā teatra telpā, leidz ar tū skateituoji sovā ceļuojumā pa četru sīvīšu liktinim pi reizis apceļuos ari teatri.
„Skateituojs īs gostūs pi kotrys varūnis, kab uzklauseitu juos stuostu i izzynuotu, kaidys emocejis i puordzeivuojumi kluseibā mutuļoj juos dvēselis dzeilēs. Kotrai grupai itys stuosts golā veiduosīs vīns, tok jī pīdzeivuos tū dažaidi, jo suoks ar cytu skotpunktu,” dasoka režisore.
Izruodis „Pi klusim iudinim” scenografs ir Raimonds Vindulis, kostimu muokslinīks – Gatis Timofejevs, gaismu muokslinīks – Sergejs Vasiļjevs. Lūmuos: Inese Ivulāne-Mežale, Agnese Laicāne, Maija Korkliša, Kristīne Veinšteina. Izruode latvīšu volūdā.
Nuokušuo izruode – 22. decembrī 18.30 stuņdēs.
Bileti: Daugovpiļs teatra kasē (654 26520), „Biļešu paradīze” kasēs i škārsteiklā www.bilesuparadize.lv.
Foto: Gatis Timofejevs
