Izruodis pamatā ir amerikaņu rakstnīka Horasa Makoja romans „Nūdzeitus zyrgus ari nūsaun, nui?” (They Shoot Horses, Don't They?), kura radeišonu īdvasmuoja realys nūtikšonys Amerikā Leluos depresejis laikā, kod tyka pīdzeivuots naciļvieceigu deju maratonu bums. Krize īdzyna cylvākus izmysumā, i suocēs sarežgeita ceiņa par izdzeivuošonu. Sovutīs deju maratoni, kuri varēja iļgt mienešim, palyka par vīnu nu peļnis olūtu, tok reizē ari par nažieleigu puorbaudejumu ar puoruok augstom likmem.
Kotram deju maratona dalinīkam ir sovs motivs. Kaids cer iz maizis kimūsu, cyts iz slavis šaļti, vēļ kaids iz apsūleitū laimastu. Cik lelu slūgu ir gotovs panest cylvāks, dzanūtīs piec carātuos laimis? I voi spiej apsastuot, kod nosta palīk par gryutu i suoc spīst jū pi zemis?
.jpg)
“Itei izruode ir puordūmys par totalu vīntuleibu, pat tod, ka kaids ir sūpluok, par patīsu jiutu, gribiešonu i prīcys naatgrīzenisku pagaisynuošonu, par sistemu, kura nūgalynoj cylvāku cylvākā. Tok kotram ir vareiba izalaseit – aizīt voi palikt. Dzeive ir myusu izalaseišonu suma,” stuosta izruodis horeografe i libreta autore Irina Bogeruka.
Pyrmizruodis skateituoju rynduos beja ari Saeimys deputats Olegs Burovs, kurs piec izruodis nūsavieršonys pasadaleja sovūs īspaidūs: “Pa munam, stuovaplausi i “bravo” saucīni vysu ir izsacejuši. Itei izruode mums cīši patyka, breineigs vysys trupys dorbs - plastika, kusteibys, kostimi, režeja. Tys, kū mes redzējom iz skotivis, magnetiskai pīvalk, i laiks paskrīn namonūt. Jums ir ar kū lapnuotīs. Nūvieleju rodūšys veiksmis ari iz prīšku i gaidom Reigā.”
“Smoga izruode, kura nūsaverama vīnā īelpā. Izruode, kura reizē līk baudeit i dūmuot, kurā ir daudz nūsaceituo i reizē cīši vitala. Da izruodis finala navarieju aplaudēt, kam vysu laiku givu sevi pi dūmys: ka aplaudiešu, pīsavīnuošu tim – maratona skateituojim. Tok finalā aplausi vysim: doncuotuojim, akterim, veiduotuojim,” emocejuos pasadaleja Daugovpiļs Universitatis Dr. philol. prof. Elīna Vasiļjeva.
Īstudiejumā “Nūdzeitus zyrgus nūsaun” ir apvīnuota deja, skotivis kusteiba, vokals i akterspēle. Golvonajuos lūmuos - doncuotuoji Aleksandra Koguce (Glorija) i Jevgenijs Mihailovs (Roberts). Izruodis rodūšū komandu veidoj scenografe i kostimu muokslineica - Inga Bermaka, originalmuzykys autors – Aleksejs Fedotovs, izruodis muokslinīcyskais vadeituojs – Olegs Šapošnikovs, gaismu muokslinīks - Sergejs Vasiļjevs. Tei paradzāta skateituojim nu 16 godu vacuma. Ilgums - 1 stuņde 50 minutys (divejūs cielīņūs).
Nuokušuos izruodis – 24. i 25. oktobrī 18.30 stuņdēs.
Bileti - „Biļešu paradīze” kasēs i škārsteiklā www.bilesuparadize.lv.
