„Makbets”, vīna nu tymsuokūs Šekspīra lugu, uzskotami paruoda, kai cylvāks, kura rūkuos teik vara, apzynuotai voi naapzynuotai mādz izavielēt atslēgt sevī ciļvieceibu i pakuopeniski puortūp par nažieleigu monstru. Izruode atspīgeļoj ituos baismeiguos puormainis – kai cylvāks puortūp par tiranu, kai vardarbeigā ceļā dabuotuo vara i izmiseigī ceņtīni tū taidā veidā ari nūturēt īdzan paranojis, vainis apzinis, baiļu i uorpruota giustā.
Itei izruode tyka lūluota ilguoku laiku, jo suokumā beja īcarāta kai akteru diplomdorbs, tok niu pīdzeivuos pyrmizruodi jau kai pylnvierteiga repertuara izruode, kurā puorsvorā pīsadola teatra „jaunais ašnis” – akteri, kuri itūvosor absolvējuši Stanislava Broka Daugovpiļs Muzykys vydsškolys akterkursu. Izruodis daleibnīkim beja unikala vareiba īsadzilinuot Šekspīra dorbā i vuiceitīs ituo klasika vuorsmys originalvolūdā ar britu aktera, pasnīdzieja i Šekspīra daiļradis pietnīka Pola Gudvina (Paul Goodwin) paleidzeibu. Pola Gudvina meistarklasis Daugovpiļs teatrī tyka eistynuotys ar British Council puorstuovnīceibys Latvejā paleigu.
“Pādejuo goda laikā Pols Gudvins snēdze vairuokys meistarklasis Daugovpiļs teatra akterim. Itūs meistarklašu laikā jī struoduoja pi lugys „Makbets” tālu analizis, pi skotivis runys, kusteibys vyngrynuojumu. Nūdarbeibys nūtyka angļu volūdā, i meistarklašu rezultati deve impulsu īstudēt Šekspīra „Makbetu”, saglobojūt izruodē ari lugys originalvolūdys skaniejumu,” stuosta Daugovpiļs teatra direktors i izruodis režisors Olegs Šapošnikovs.
Taipat režisors aicynoj skateituojus nasabeit nu angļu volūdys: “Tei byus eipašys atmosferys izruode – varys apdullynuota pruota nūstyurūs skateituoji īsavērs ari ar akteru kermiņa volūdys storpnīceibu. Šekspīra dzejis skaniejums originalvolūdā boguotynuos izruodi kai skaista muzyka, tok teksts nabyus nūteicūšais nūteikūšuo uztverē.”
Makbets nūtyc treju rogonu pareguojumam, ka koč kod jis tiks par Skotejis karali. Kuoreiba piec varys pa mozam aptymsoj juo i sīvys pruotu, i, kod pyrmais duņcs ir ašņa apslaceits, atpakaļceļa vaira nav – kotrys nuokušais sūļs vierzej Makbetu vys tyvuok preteimā poša izniceibai.
Makbeta lūmā īsajuss Miroslavs Blakunovs, puorejuos lūmuos: Artjoms Afanasjevs, Eduards Beļnikovs, Vanda Gibovska, Aleksandra Koguce, Agnese Laicāne, Alisa Matvejeva, Jevgenijs Mihailovs, Svetlana Morozova, Raimonds Paegle, Luiza Prokofjeva, Milena Savkina, Darja Šakalova, Marks Šelutko, Kristina Tiško, Vladislavs Vasiļjevs. Izruodis horeografe ir Irina Bogeruka, scenografe i kostimu muokslineica – Inga Bermaka, gaismu muokslinīks – Sergejs Vasiļjevs.
Pyrmizruode nūtiks 22. novembrī 18.30 stuņdēs; nuokušuo izruode – 24. novembrī 18.30 stuņdēs.
Izruode ilgs 1 stuņdi 20 minutys. Tei nūtiks angļu i krīvu volūdā ar tulkuojumu latvīšu volūdā titrūs.
Bileti: Daugovpiļs teatra kasē (654 26520), „Biļešu paradīze” kasēs i škārsteiklā www.bilesuparadize.lv.
