Izruode veiduota piec greku rakstneicys Lenys Divani romana “Septenis dzeivis i vīna lela mīlesteiba. Kača memuari” motivu. Izruodis varūņam itei jau ir septeituo dzeive, i jis ir styngrai nūsprīds, ka tuos nadreikst iznīkuot. Liktiņs jū ir saveds ar rakstneicu, i kačs giunās pi juos pīradynuošonys, kab tyktu īmyužynuots kaidā nu juos stuostu.
Vysuvaira izruodis teik veiduotys par cylvāku attīceibom sovā vydā, rešuok par tū, kaidys attīceibys veidojās cylvāka i dzeivinīka vydā. Tok rodūšuo komanda ir puorlīcynuota, ka itaidys attīceibys pamat na mozuok nūzeimeigu nūspīdumu cylvāka dzeivē. Jau nu seneju laiku kačim teik pīsauktys magiskys eipašeibys. Cylvākam varātu ruodeitīs, ka jis ir tys, kurs pījam lāmumu pajimt sātā kaču, tok patīseibā dzeivinīks izalosa sev saiminīku. Mādz saceit, ka jis īsarūn ar sovu syuteibu taišni tod, kod ir vysvaira vajadzeigs.
Izruodis “Kača memuari” varūņs rūn sātu pi sīvītis, kuruos sirds ir cīši nūslāgta, tok kača naatlaideiba pīruodeit sovu nūzeimeibu vysu maina. Režisors Māris Korsiets stuosta: “Kačam ir svareigi, kab jū īlaiž sirdī, koč i nu molys tys tai na vysod izaver. Myusu varūņa saimineica ir dzeļža ledeja, kurei kluotyn vēļ sevi skaita par suņu cylvāku. I itamā izruodē teik izstuosteits juos sirds pakuopeniskuos atmaigšonys stuosts. Tei ir izruode par mīlesteibu i dzeivinīka uzticeibu.”
“Bīži viņ cylvākim dzeivinīki sātā ir tik kai objekts, kurs pylda koč kaidys funkcejis. Grybātūs, kab vairojās izpratne, ka ari dzeivinīki jiut; ari jim ir sovys dūmys; ari jim nav vīnolga. Varbyut škierslis tū saprast ir tys, ka dzeivinīki narunoj “myusu volūdā”? Ka tys tai ir, tod itamā izruodē tiks dūta vareiba sadzierdēt, kas tod dzeivinīku pruotūs varātu nūtikt. I varbyut saprast, ka bīži viņ mes, cylvāki, poši uzavadam kai dzeivinīki, na tamā lobuokajā nūzeimē, cikom dzeivinīki var byut “ciļvieceiguoki” nakai poši cylvāki,” stuosta aktrise Zanda Mankopa.
Izruodis rodūšū komandu veidoj Māris Korsiets (režeja), Kristīne Veinšteina (dramatiziejuma autore), Egils Viļumovs (scenografs i kostimu muokslinīks), Gatis Preitāgs (muzykys konsultants), Sergejs Vasiļjevs (gaismu muokslinīks). Nu greku volūdys tulkuojuse Iveta Skrastiņa.
Izruodis ilgums – 1 stuņde 10 minutys, paradzāta skateituojim nu 14 godu vacuma.
Pyrmizruode – 10. decembrī 18.30 stuņdēs, nuokušuos izruodis – 11. decembrī 18.30 stuņdēs, 25. janvarī 13.00 i 18.00 stuņdēs.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
