Daugovpiļs teatrī itūsezon: namaineigys tradicejis i nagaideiti puorsteigumi, kaisleibys skandinavu gaumē, tok latgalīšu mēlē, īru malnais humors jauna režisora redziejumā, kusteibu izruode par ceiņu ar sovom vuojeibom, jautra detektivmeikle vysai saimei, kača “grāksyudze” aktrisis Zandys Mankopys izpiļdejumā, i tys vyss tik sezonys pyrmajā pusē.
Itū sezonu Daugovpiļs teatris atkluos 6. septembrī ar kusteibu izruodis “Nūdzeitus zyrgus nūsaun” pyrmizruodi. Sižets ir baļsteits iz amerikaņu rakstnīka Horasa Makoja romanu “Nūdzeitus zyrgus ari nūsaun, nui?” (They Shoot Horses, Don't They?), kura radeišonu īdvasmuoja realys nūtikšonys Amerikā Leluos depresejis laikā, kod tyka pīdzeivuots naciļvieceigu deju maratonu bums. Itei izruode caur deju i kusteibu atspīgeļuos cylvāka ceiņu ar sovom vuojeibom i napuorvaramim apstuoklim. Horeografe i libreta autore ir Irina Bogeruka, izruodis muokslinīcyskais vadeituojs – Olegs Šapošnikovs.
.jpg)
Septembra izskaņā gaidoma pyrmizruode jautram detektivam bārnim nu 6 godu vacuma “Sorkonuos sātys nūslāpums”, kura pamatā ir Andrys Manfeldis “Voi mama sātā?”, kura 2024. godā tyka nomināta Latvejis Literaturys goda bolvai kategorejā “Lobuokais literaturys autordorbs bārnim”. Izruodis režisore ir Liena Šmukste, dramatiziejuma autore – Rūta Dišlere. Izruode nūtiks 26. i 29. septembrī.
Sezonys suokuos gaidomys ari vīsizruodis Reigā – jau īspiejams nūpierkt biletus iz komedeju “Garuos breivdīnys”, kura nūtiks 17. septembrī Mihaila Čehova Reigys Krīvu teatrī. Taipat septembrī teatris jau tradicionali pīsadaleis storptautyskā muokslu festivalā “Trans/mission Balticum”, kurs nūteik Leitovā, sābru vaļsts skateituojim itūreiz pīduovojūt izruodi “Makbets”.
Sovutīs oktobrī taps Nobela premejis laureata literaturā, norvegu rakstnīka i dramaturga Juna Fosis lugys “Nokon kjem til å kome” īstudiejums latgaliski “Kaids nūteikti atīs” Olega Šapošnikova režejā. Tys byus psihologisks trillers par pakuopeniski pīaugūšu sprīdzi kaida puora attīceibuos. Īstudiejums tūp ar Norvegejis Karalistis viestnīceibys Latvejā paleigu.
Novembrī tiks pyrmizruodeits aktera Vadima Bogdanova pyrmais režejis dorbs profesionalajā teatrī – dramaturga Mārtina Makdonys ar malnū humoru pīsuotynuotuo tragikomedeja “Vīntuleigī rītumi”. Izruodē pīsdola: Margers Eglinskis, Miroslavs Blakunovs, Vladislavs Vasiļjevs i Kristina Tiško.
Taipat rudinī gaidoma pyrmizruode aktrisis Zandys Mankopys monoizruodei “Kača memuari” (režisors Māris Korsiets).
Nailgi pyrma godumejis skateituojim tiks saryupāts Jaungoda koncerts, kas jau ir palics par naatjemamu teatra tradiceju.
Bileti iz izruodem septembrī i oktobrī jau ir puordūšonā. Biletus var nūpierkt Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
Foto: Džeina Saulīte
