Durovys skateituojim teātris viers vaļī septembrī, pīduovojūt repertuāra izruodes, sovukuort pyrmūs jaunīstudiejumus varēs baudeit nu oktobra. Pavysam dreiži dorbu pi sova pyrmuo īstudiejuma Daugavpiļs teātrī suoks režisore Liena Šmukste, dramaturģisko materiālu, kam pamatā byus Regīnas Ezeras stuosti, radeis dramaturģe Agnese Rutkeviča. Oktobrī gaidāma pyrmizruode arī ukraiņu dramaturga Alekseja Kuraļeha lugas “Pamīrs” īstudiejumam krīvu volūdā, kura režisors byus Māris Korsiets.
Sezonys pyrmajā pusī skateituoju viertiejumam tiks nūdūta izruode “Makbets” Oļega Šapošņikova režejā, kura tūp sadarbeibā ar britu pedagogu, aktīri i režisoru Polu Gudvinu. Sovukuort Ivars Lūsis īstudēs izruodi „Snīga giustā”, kurā spieļuos kūpā ar Jūliju Ļahu. Tuopateņ šūsezon horeogrāfe Irina Bogeruka teātra lelajā zālī īstudēs jaunu dejas izruodi.
Septembrī Daugavpiļs teātris dūsīs izbraucīnā iz Ļītavu – izruode “Cylvāks nu Podoļskys” pīsadaļeis festivālā „Trans/misijos Balticum” Viļņā. Šūrudeņ naizpaļiks arī braucīņs iz Reigu. Golvaspiļsātas skateituojim tiks piduovuots vēļ vins kolorīts Daugavpiļs teātra īstudiejums latgaļiski – gondreiž krimināla komēdeja „Divejis vyrtuvē, naskaitūt nabašnīku” jeb „Divas virtuvē, neskaitot līķi”.
Vēļ aizvīn turpinojās Daugavpiļs teātra aktīru kursa uzjimšona Staņislava Broka Daugavpiļs Muzykas vidusškolā. Izglīteibas programmas „Teātra muoksla” ilgums ir 2 godi, pīšķiramuo kvalifikāceja – aktīrs. Par jaunūs aktīru profesionālū izglīteibu ryupejās Daugavpiļs teātra aktīri i te struodojūšī režisori, kai arī pīaicynuotī teātra muokslas nūzares profesionāļi nu citim teātrim i uorvalstīm. Īsnīgt sovu pīteikumu var Staņislava Broka Daugavpils Muzykas vidusškolā ļeidz augusta beigom. Vairuok par aktīrkursu i uzjemšonu var uzzināt šeit, kai arī www.sbdmv.lv.
Biļeti iz izruodem septembrī jau ir puordūšonā. Tuos var nūpērkt Daugavpiļs teātra kasī (654 26520), „Biļešu paradīze” kasēs vysā Latvejā i internetā www.bilesuparadize.lv.
