Vyss suocās ar tū, ka saime īsavuoc sorkonā sātā, kurā nūslāpumainūs apstuokļūs vyss pagaist. Na tik zečis, skryuvis i būrtneicys... Kaidu dīnu pagaist ari mama! Tok kurs atrass mamu, ka mama ir tei, kas vysu vysod atrūn? Izmaklātuojs-japuoņs steidz saimei paleigā, i suocās aizraunūša sorkonuos sātys nūslāpumu škatynuošona, kurā īsasaista vysi – tēte, meitys, vaciks i obeji kači. Nigu ņagu ar interesantom beigom – tai eisumā raksturoj izruodi režisore.
Izruodis pamatā ir Andrys Manfeldis gruomota “Voi mama sātā?”, kura 2024. godā tyka nomināta Latvejis Literaturys goda bolvai kategorejā “Lobuokais literaturys autordorbs bārnim” i tyka raksturuota kai “mīlesteibys viestule vysom mamom”. Režisori suokumā pīsaisteja ituos gruomotys vizualais nūformiejums, sovutīs jau pyrmuos puslopys uzrunuoja ar autoris spieju ospruoteigai i vīglai pastuosteit bārnu auditorejai par mamu kasdīnu.
“Grybātūs izduovuot bārnim i jūs vacuokim byušonu kūpā, īšonu kūpā iz teatri i radzātuo puorrunuošonu kūpā. Ari mamys šaļtim nūgurst, na vysod juos ir prīceigys i spāka pylnys, šaļtim juos mādz pīlaist klaidys, šaļtim nūteik ari puorprotumi, tok tymā vysā nav nikuo naloba. Maņ ruodīs, ka sevkura saime, kurai redzīs, ka jūs saime ir vystrokuokuo, vyshaotiskuokuo, vysnasavuoktuokuo, vysod ir vysharmoniskuokuo, vysdraudzeiguokuo i vysnormaluokuo. Kam vysuos saimēs ir šaļts, kuruos īsastuoj piļneigs haoss i nikuo navar savuokt, i ir šaļts, kod itys haoss sasadūd rūkuos i vysi īt vīnu ceļu, ceinejās par tū, kas ir svareigs,” puordūmuos doluos režisore Liena Šmukste.
Izruode ir dūmuota kai sirsneigs, muzykals i humora pylns pīdzeivuojums vysai saimei. Tuos rodūšū komandu veidoj Rūta Dišlere (dramatiziejums), Raimonds Vindulis (scenografeja), Jana Čivžele, Anna Elizabete Kasparsone (kostimi), Mikus Frišfelds (muzyka), Elizabete Vindule (animaceja), Sergejs Vasiļjevs (gaismys). Lūmuos: Agnese Laicāne, Inese Ivulāne-Mežale, Kristīne Veinšteina, Jūlija Ļaha, Margers Eglinskis, Eduards Beļnikovs, Nikolajs Gedzjuns, Raimonds Paegle.
Pyrmizruode nūtiks Daugovpiļs teatra lelajā zālē 26. septembrī 12.00 stuņdēs, nuokušuos izruodis - 29. septembrī i 5. novembrī 12.00 stuņdēs. Izruode latvīšu volūdā, tuos ilgums ir 1 stuņde.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
Publicitatis biļdis zeimiejuma autore – Anna (6 godi).
