Izruodē atspīgeļuots ilgstūšs deju maratons, kura daleibnīki, izmysuma vadeiti, ir gotovi iz vysu, kab dabuotu apsūleitū laimastu. Mali, bailis, nūdeveiba i gūdkuoreiba pamozom pīsuotynoj ituo šova gaisu, kura kotru šaļti kuoreigai giun skateituoji. Konkurss palīk par seivu ceiņu par vītu zam saulis, i tim, kas naspiej atsasaceit nu sapyna par lelū laimastu, daīt zīduot daudz vaira, nakai jī beja suokumā dūmuojuši.
Izruodis sižets ir baļsteits iz amerikaņu rakstnīka Horasa Makoja romanu „Nūdzeitus zyrgus ari nūsaun, nui?” (They Shoot Horses, Don't They?), kura tapšonu īdvasmuoja realys nūtikšonys Amerikā Leluos depresejis laikā, kod tyka pīdzeivuots naciļvieceigu deju maratonu bums.
Tūlaik itaidi maratoni varēja nūritēt mienešim ilgi, līkūt daleibnīkim byut namiteigā kusteibā, atļaunūt viņ nailgus puortraukumus, tok grybātuoju itaidā veidā nūpeļneit, izasist šovbiznesā voi vīnkuorši byut paādušim i syltumā natryuka, taipat kai skateituoju, kas iz daleibnīku mūkom nūsavēre kai iz aizraunūšu izruodi. Itaida maratona aizkulisis i izaicynuojumus Horass Makojs atspīgeļuojs romanā, i daudzim skateituojim tuo sižets varātu byut zynoms, pasasokūt 1969. gods ekranizacejai Sidnija Polaka režejā ar aktrisi Džeinu Fondu vīnā nu golvonūs lūmu.
Izruodis horeografe i libreta autore Irina Bogeruka stuosta: “Stuosts nabyus par deju kai taidu, tys byus stuosts par cylvāka īškejū spāku i vuojeibom, kurys eipaši spūdrai izapauž sarežgeituos situacejuos. Par grākim. I par liktineigom izvielem.”
“Itamā izruodē atspīgeļuoti vysaidi celi, kurus izalosa īt izruodis varūni, teikūt napuorvaramūs apstuokļūs. Kaids izalaseis ceiņu, kab napuorsavārstu par dzeivinīku – nūdzeitu zyrgu; kaids par nūdzeitu dzeivinīku vystik puortaps, naspādams ceineitīs par sevi; kaids, nagrybūt voi naspiejūt tuoļuok ceineitīs, puortrauks sovu pastuoviešonu, saradzūt itaidā izejā alternativu ciļvieceibys zaudiejumam,” dasoka izruodis muokslinīciskais vadeituojs Olegs Šapošnikovs.
Īstudiejumā “Nūdzeitus zyrgus nūsaun” byus vārojama dejis, skotivis kusteibys, vokala i akterspēlis sinteze, i tymā pīsadaleis gondreiž vysa teatra trupa. Titullūmuos – doncuotuoji Aleksnadra Koguce (Glorija) i Jevgenijs Mihailovs (Roberts). Izruodis scenografe i kostimu muokslineica – Inga Bermaka, gaismu muokslinīks – Sergejs Vasiļjevs. Izruodē byus izmontuota vairuoku komponistu muzyka, t.sk. daugovpilīša Alekseja Fedotova speciali izruodei komponātys kompozicejis. Izruode paradzāta skateituojim nu 16 godu vacuma. Ilgums: 1 stuņdi 30 minutys.
Pyrmizruode Daugovpiļs teatra lelajā zālē – 6. septembrī 18.30 stuņdēs. Nuokušuos izruodes – 7. septembrī 18.00 stuņdēs, 24. i 25. oktobrī 18.30 stuņdēs.
Bileti – „Biļešu paradīze” kasēs i škārsteiklā www.bilesuparadize.lv.
