Izruodis “Vīntuleigī rītumi” golvonī varūni ir diveji bruoli, kurūs attīceibuos volda naids i aizvainuojums. Obeji naseņ paglobuojuši tāvu, tok tys natraucej turpynuot sovā vydā lomuotīs, kū var izraiseit kai navītā izsaceits komentars, tai ari nasadaleita čipsu paka. Tok jūs vīnoj na viņ bierniškeiga gribiešona īrībt ūtram, tok ari kaids tymss nūslāpums.
Īstudiejuma pamatā ir īru izceļsmis britu dramaturga, scenarista i režisora Mārtina Makdonys luga “Vīntuleigī rītumi” (“The Lonesome West”, 1997), kas ir autora “Līnenys trilogejis” nūslādzūšais dorbs. Juo lugys sajāmušys naskaitomys bolvys, i tūs īstudiejumi nav reši ari Latvejis teatrūs. Mārtina Makdonys lugom rakstureigs malnais humors, absurds, cinisms i rupums. Ituo autora styls i radeitais vysums uzrunuoja ari režisoru Vadimu Bogdanovu, kuram ir tyvs malnais humors, sovutīs malnuos komedejis žanrs redzīs pateiceigs i saistūšs izaicynuojums akteriskā ziņā.
“Vīntuleigī rītumi, prūtams, nav kaida geografiska vīta, dreižuok - dvēselis stuovūklis; tei ir telpa i stuovūklis, kurā moralūs vierteibu skola teik apgrīzta ūtraiž, kur naids pret tyvuokajim palīk par koč kū normalu i daudz dabyskuoku par mīlesteibu. Koč i ite situacejis i varūni teik aizvasti da absoluta, ir saradzamys paralelis ar kasdīnys dzeivi. Ari kasdīnā mes varim byut sirdeigi iz sovu tyvuokūs, aizvainuojumā nūdareit jim puori, na da gola izprūtūt, parkū tys tai nūteik. Kluotyn vēļ bīži viņ asam daudz nažieleiguoki pret sev tyvim cylvākim nakai pret svešinīkim. Deļkuo? Tys ir lobs vaicuojums,” puordūmuos doluos režisors.
Vīntuleigūs rītumu dzeivuotuojus attāluos Miroslavs Blakunovs, Vladislavs Vasiļjevs, Margers Eglinskis, Kristina Tiško. Izruodis rodūšajā komandā ir scenografs i kostimu muokslinīks Egils Viļumovs i gaismu muokslinīks Sergejs Vasiļjevs. Izruode byus krīvu volūdā ar tulkuojumu latvīšu volūdā titrūs. Paradzāta skateituojim nu 16 godu vacuma.
Pyrmizruode nūtiks 16. novembrī 18.00 stuņdēs, nuokušuo izruode – 21. novembrī 18.30 stuņdēs.
Bileti: Daugovpiļs teatra kasē (654 26520), „Biļešu paradīze” kasēs vysā Latvejā i škārsteiklā www.bilesuparadize.lv.
