27. martā Daugovpiļs teatrī nūtiks diveji teatra profesionalajim svātkim veļteiti pasuokumi – Solomona Mihoelsa skulpturaluo portreta atkluošona i Teatra dīnys koncerts.

Daugovpiļs teatris aicynoj vysus teatra muokslys cīneituojus svieteit itūs svātkus kūpā Teatra dīnys koncertā. Tuo pyrmū daļu veiduos muzykali teatrals izvadums, kas veļteits teatra legendai Solomonam Mihoelsam i juo dailradei. Sovpus koncerta ūtrajā daļā skateituojus sagaideis jautrys teatra kapustniks – akteru i teatra draugu saryupāta izklaidis programa, kurā muzykali prīšknasumi meisīs ar ospruoteigu teatra i pasauļa nūtikšonu apskotu. Koncerts suoksīs 18.30 stuņdēs, īīšona teatrī nu 18.00 stuņžu.  

Itamā dīnā teatrī tiks atkluots ari Solomona Mihoelsa skulpturalais portrets, kurū veiduojs tieļnīks Glebs Pantelejevs. Tei ir Reigys ebreju kūpīnys duovona, kas topuse ar Latvejis ebreju kūpīnys restitucejis fonda finansialū atbolstu. Skateituoji varēs apsavērt Solomona Mihoelsa skulpturalū portretu teatra foaje i pyrma koncerta, i ari teatra apmekliejuma reizēs iz prīšku.

Bileti iz Teatra dīnys koncertu byus puordūšonā nu 19. februara 12.00 stuņžu Daugovpiļs teatra kasē (654 26520), „Biļešu paradīze” kasēs i škārsteiklā www.bilesuparadize.lv.

Solomons Mihoelss (eistajā vuordā Šloime Vovsi) pīdzyma i pyrmūs 15 dzeivis godus pavadeja Daugovpilī (tūreiz Dinaburgā, Dvinskā). Jis ir īguojs viesturē kai režisors, akters, pedagogs, sabīdryskais darbinīks, Moskovys Vaļsts ebreju teatra muokslinīcyskais vadeituojs. Juo davums teatram beja 14 izvadumi i vaira nakai 30 nūspālātys lūmys. Vīna nu juo skotiviskuos meistareibys viersyuņu beja Šekspīra karaļa Līra atveiduojums. Kotru godu martā Daugovpilī nūteik Solomona Mihoelsa dīnys, kod teik svieteita pasauļslovonuo daugovpilīša dzimšonys dīna.

‍